views

الثلاثاء، 13 ديسمبر، 2011

قصيدة شارع محمد محمود

ورغم الحيرة والالغاز فقلبي ليكي شايل حلم

 ولاجلك جي اشم الغاز ولاجلك جي اشيل الهم

بحبك شمس في الميدان بحبك فيكي ناس تتلم

بشوفك شاب في العشرين  يقع ويقوم ويحدف طوب

بيجي مع طلوع الشمس ويفضل بعد كل غروب

يقول لابوه هروح الدرس  وف البيت قاعدة تدعي الام

يا رب يسلمك م الغم.. يا رب يسلمك م الغم

بشوفك بنت لابسة حجاب وبنت بشعرها ..مكشوف 

بتجري تسعف المصابين ولا تعرفشي طعم الخوف

واشوفك ابنك الرغاي واشوفك تخميسات في الشاي

ونوم ساعتين في عز البرد وراحة متفهموش ازاي

واشوفك شاب صوتوا جميل يكون سهران بطول الليل
يغني يحمس الباقيين ويملا الجو بالمواويل

واشوفني سعات اكون قلقان والاقي في كتفي كل رفيق

واقوله هيدخلوا الميدان؟ يقول على جثتي يا شقيق

يروح ويعود كمان متشال وصدره قد اتملى بالسم

ورغم الحيرة والالغاز فقلبه ليكي شايل حلم

ولاجلك جه يشم الغاز ولاجلك جه يشيل الهم

واشوفك دم عالاسفلت وكلب بيضرب الخرطوش

وابنك ثابت الاقدام ولا اترعشوا ولا اتراجعوش

عشانك صامد   المعوور ورغم انه بعين واحدة

ولااجلن يوم تشوفي النور حلف ما تعيشي متاخدة

بعينه التانية ضحى كمان  ولأجلك عينه تنزف دم

ورغم الحيرة والالغاز فقلبه ليكي شايف حلم

ولاجلك جه يشم الغاز لاجلك جي ينزف دم

ولاجلك جه يشم الغاز ولاجلك جي ينزف دم
 

مش حاسس

وفلحظه قفلت الاوضه عليا
بعد شوية ...لقتنى مش حاسس
ايه ده... بجد ولا مجرد هاجس؟
باصص لشريط عمري يعدى
والدنيا ياما بتجيب وتودى
و ف ثانية ببص ومش شايف
وانا ....أنا الكنت زمان بصير
وازاى اطير والحزن كابس
ازاي اطير والحزن كابس

السبت، 26 نوفمبر، 2011

لماذا لن اشارك في الانتخابات ...

بكل بساطة انا بنزل غالبا كل يوم الميدان وبهتف  ويطلع عيني في محمد محمود ويغم عليا واقوم تاني واقول" يسقط يسقط حكم العسكر"..يسقط الظلم ويسقط نظام الظلم يسقط الفساد ويسقط كل نظام فاسد.
منين انا بتفشخ عشان  يسقط نظام العسكر و لما يجي العسكر يقولوا انا هعمل انتخابات بس هنفضل قاعدين بعدها, أشارك انا فيها, كدة كأني بعترف بشرعية المجلس وكمان بلطخ ايدي بدم شهداء استشهدوا في الميدان بإيد المجلس العسكري لاني بمده بالشرعية.
طيب ما نعمل انتخابات و مجلس الشعب  المنتخب يعين حكومة تدير البلد  ونبوس المجلس من هنا ومن هنا ونقوله احنا هنقعدك على خازوق محترم ونحاكمك والمفروض انه يوافق طبعا ويقعد على الخازوق ويحط رجل على رجل.
من امتى العسكر اصلا تركوا الحكم بانتخابات , إما بيتم اقالتهم بانقلاب او يموتوا موتة ربنا او  بيتم اغتيالهم او بقى ثورة  على الظلم زي حالة المخلوع كدة, بمعنى ان العسكر ميعرفوش يعني ايه ديمقراطية وميعرفوش غير منطق القوة والعنف,لكن ابشروا الثوار يملكون االقوة اللازمة لاجبارهم على تسليم السلطة.
حد يقولي طيب ما بعد الانتخابات هيفضل معانا القوة برده اننا نمشيهم, طيب ولومرضيوش يمشوا وده الهيحصل اكيد هتقولي بقى  هننزل الميادين  وكل الكلام الحلو ده ,معرفش انت فاكر احنا قعدنا قد ايه بعد مساوئ العسكر نقول يسقط حكم العسكر وكان بيتم اعتقال ناس مننا وبنتبهدل وفي الاخر بعد عناء الناس نزلت لأن البيحصل  ان الناس بتزهق والعالم الوسخة تقولك عايزين شوية استقرار بقى ونرجع تاني من اول وجديد مش معقولة يعني كل شوية ناخد على قفانا.

اعلن نور العقاد الامتناع عن المشاركة في الانتخابات البرلمانية أو حتى الذهاب للجنة الانتخابية لإبطال صوتي وانا على استعداد تام لتحمل جميع العواقب...اه على فكرة انا قلت لأهلى ميدفعوليش ال 500 جنيه حتى لو هيحبسوني :)

الخميس، 20 أكتوبر، 2011

البكاء المكتوم

وانا لما جيت ابكي بكايا كان مكتوم
وقلت مره اشكي بس النصيب محتوم
معرفش ليه فجأة الدنيا عاندتني
وبدعي رب الدنيا والاخرة اكون مرحوم


حامدك يا خالقني وبايسها وش وضهر
بدعيك تكون جنبي مهما يزيد القهر
ومهما يوم حصل برده القدر مرسوم
عمري مسب الله عمري مسب الدهر


من بره ضحكايا ومن جوة انا مشرخ
جوايا بص وشوف في طفل  بيصرخ
انا كنت طفل زمان بضحك وانا بلعب
ووقعت على غفلة على وشي واتوسخ


وحزني غطاني غطي براءة الوش
اوعاك تصدقها ده الدنيا غش في غش
فيها المتع ياما على كل شكل ولون
اياك لتعبد يوم حب الحريم والقرش


واياك تبات ظالم واياك تبات مظلوم
واياك لتنسى فيوم ان النصيب محتوم
ولو لقيت فجأة ان الدنيا   بتعاندك
ادعي لرب الكون انك تكون مرحوم

الأربعاء، 28 سبتمبر، 2011

الوطن وطني

مجروح جبين الوطن وضهره فيه خنجر
واازاى تهون يا وطن وانا الباقي لك
سرقوك يا عمر الوطن وهيسرقوك اكتر
لو ما ناديتلى فى يوم اجى اغنيلك

هاجى اغنيلك غنوة لاحبابك
جايلك بدق الباب وراب بقى بابك
يمكن تخش الشمس تحوي فى ضؤها امل
تمحى بقايا فساد وظلم يوم صابك

معصوبة يا عيونى لكن فى قلبى حلم
لو مهما ظلمونى مش ههوى يوم الظلم
ولو تقول ظالم ظلم العباد ياما
يقولو ريسنا خلانا عايشين سلم

يابو المكان البعيد شقر علينا وطل
دور مابينا وشوف فين الترف فينه
ده الجيب وفضيته والقلب مليان ذل
واليقول مظلومين جزاءه تخوينه

يا فجر يا مشقشق تعالى ويايا
احكي حكاية شباب يا محلى ده حكاية
لما كره صمته رفع الوطن هامته
طلع الشباب الجميل واتسلم الراية

نادى بكل حقوقه نادى بحريات
كره الغباء السياسى وغش الانتخبات
كان الشباب ثوار وجيله ده جيلي
قال الشباب احرار وعليت الصرخات

يا مصر يا معجزة من معجزات ربى
بعلن بصرخاتى ازاى يكون غضبى
انا المواطن هنا وفى الميدان سكنى
حاولو يبيعو الوطن رغم الوطن وطني

حاولو ينسونى ان الوطن وطني
وجم وضربونى بس الوطن وطنى
ازاى يقسونى على الوطن وطني
لو حاولو ينفونى برده الوطن وطنى
ايوة الوطن وطنى ايوه الوطن وطني

نور العقاد
10 فبراير 2011

الجمعة، 16 سبتمبر، 2011

بحبك ايوة حبيني



 بحبك ايوة حبيني
 واوعي فيوم تفارقيني
دنا  قلبي بيهواكي وعينك عاشقة لون عيني
 شيليني فقلبك الطيب
 تمر علينا ده الايام
 انا العاشق وانا المشتاق وانا الاشواق بتكويني
 انا عايزك فيوم ضعفي بكل حنان تسانديني
 اانا العاشق فوسط الكل
 ده حتي الكل عشقوكي
 ده حتى يعني تور الشمس لما يكون على جبينك
 وتطلع ضحكة من قلبك
 ينور نوره نور عينك
 تلاقيه فجأه يتلخبط ويتبعطر ومش مفهوم
 ويفرش نوره كل مكان ويتفرق يطوف ويحوم

 حوالين وجهك المشرق كانه يعني بيغيظني
 ولما اصارحك اني بغير
 بضحكة كمان تعانديني

 ولما عقلي مني يطير بكلمة حب ترضيني
 بحبك
 ايوه حبيني واوعي فيوم تفارقيني
 انا العاشق فوسط الكل ده حتي الكل عشقوكي
 ده حتى كمان ظلام الليل
 بلون شعرك بيتلون
 ويتزين عشان يلحق وقبل الفجر يتكون
 وبيأخر طلوع الشمس عشان يفضل كده معاكي
 وبيدون حكاياتك
 في سهره كأنه بيغيظني
 واقول فارقيه بقى ونامي بسهر الليل تشاكسيني
 ولما اقولك اني بغير بكلمة حب ترضيني
 ده قلبي اسير مابين ايديك
 وعينك عاشقة لون عيني
 بحبك
 ايوه حبيني
 بحبك
 ايوة حبيني

السبت، 10 سبتمبر، 2011

عن نقابة المهندسين و اعتصام الاخوان المسلمين

كنت قلت عن حكاية نقابة المهندسين وان الاعتصام بتاع النهاردة كان بهدف رفع الحراسة القضائية والكلام ده كنت خدته من مهندس مكنتش اعرفه وقابلته عند مجلس الوزراء......طبعا انا خدت كلامه ونقلته بدون تأكد وده غلط كبير مني

الكلام الهقوله ده نقلا عن المهندس عمرو عرجون وهو احد المناضلين لاستقلال نقابة المهندسين حتى من قبل الثورة بكتير:   ................

جميع المهندسين اشتركوا فى الانتخابات التى دعا اليها الحارس القضائي قبل الحكم النهائي
لأنه دعا إليها بصفته حاصل على حكم أنه الممثل القانوني الوحيد للنقابة
ثم جاء حكم المحكمة بانهاء الحراسة فطلبنا من الوزير ان يشكل لجنة تستلم النقابة وتستكمل اجراءات الانتخابات
او تجرى انتخابات جديدة وعرضنا عليه مقترحات لمعايير الاختيار واسماء فوافق
تقوم اللجنة باستلام النقابة وتسيير شئونها بدون عمل حسابات السبعة عشر عاما السابقة التى لم يتم تقديم ميزانيات لها فالمحاسبة على ما سبق هى مهمة المجلس المنتخب الجديد

وكان في اجتماع امس يضم 12 مهندس ممثلين لجميع قوى المهندسين على الساحة وقد توافق الجميع على ذلك

كلامي انا بقى:
طيب مين العامل اعتصام النهاردة وده الاستغربته....الاخوان المسلمين(م عمر عبد الله وم عصام ابراهيم وم تامر طلبة ...الخ)...بغض النظر عن نواياهم  ده حاجة مش عايز اخوض فيها


لكن اجماع 12 من القوى للمهندسين الموجودة على الساحة على شئ يخالفه الاخوان المسلمين شئ برده عجيب وانا عن نفسي اثق في المهندس عمرو عرجون   اكتر من الاخوان وده حاجة تخصني

المهم كان لازم اقولكم الكلام ده بعد ما ورد ليا ان الاعتصام قفل شارع رمسيس وعطل المرور وبرده ده حاجة مستغربها من الاخوان

واخيرا ادعوكم لمساندة استقلال نقابة المهندسين  ليكون هناك كيان حقيقي ممثل للمهندسين يدافع عن حقوقهم ويقودهم لعمل نهضة في مصر والمهندسين قادرين على تحقيقها باذن الله

الجمعة، 2 سبتمبر، 2011

قصة المهندس عبد الله احد المعتقلين في السجون السعودية

               في حد ممكن يقول هو احنا خرجنا المعتقلين في مصر بسبب المحاكمات العسكرية لما هندور على المعتقلين في السعودية...لكن القضية واحدة وهي الحرية والكرامة لكل المصريين

          المهندس عبد الله مصري ملتحي لكن هو لا ينتمي لأي جماعات دينية كان عايش في الممكلة السعودية لحد اولى ثانوي ورجع  مصر حصل على الثانوية الازهرية وكان الاول على القاهرة والثاني على الجمهورية ودرس الهندسة الميكانيكية واشتغل في السعودية تاني وكان زي اي حد مهتم بالقضايا المعاصرة في وقتها  الكانت بتحصل زي احداث العراق و البيحصل لاخواتنا الفلسطينيين وكان بشارك في الكلام عن القضايا ده على النت
    
   عبد الله تم اعتقاله من 3 سنين او بكلمة ادق تم اختطافه من جهات امنية سعودية (امن الدولة عندهم يعني)  عبدالله دلوقتي عنده 29 سنة لك ان تتخيل مستقبل شاب في عمره وهو بيتدمر بدون تهمة بدون محاكمة بايد المملكة السعودية






 



 

                 اهل عبد الله طبعا حاولوا يسلكوا كل الطرق وأخرها ذهابهم لمساعد وزير الخارجية الكان وصف اخت عبد الله ليه انه راجل محترم وقالهم " انه متعاطف مع عبد الله جداً وانه عارف موضوعه وعارف انه معليهوش حاجه وقال ان وزير الخارجيه خد معاه  ملف المعتقليين السياسين في السعوديه بس السعوديين متباطئيين جداً في الإستجابه " .....اقصى ما بذله المسئولين هو التعاطف مع عبد الله


  




               ده حكاية اعتقال عبد الله  البعتتها اخته  ليا من غير ما اغير  فيها حاجة


في يوم  3/6/2008عبدالله راحح شغله في شركة شلمبرجير في الدمام في السعوديه وبعد ساعات مراتو "عروسه بقالها 6 شهور بس " لقيت الباب بيخبط فتحت لقيت كمية غير طبيعية من رجال المباحث ومعاهم عبدالله قالها البسي يا اسراء عشان معايا ناس ولبست وفتحت لقيتهم دخلو البيت وتفتيش غير عادي كل حاجه فتشوها واخدو الابتوبات وكل الفلوس اللي في البيت وجوازات السفر واهم من ده كله اخدو عبد الله وقالولها بليل بيرجع ان شاء الله ....مرة ساعت الرعب على مراتو وتاني يوم استدعوها للتحقيق وفرجوها على الزنازين وقالولها لو مقولتيش كل حاجه هنحطك في زنزانه من دول ...من ضمن الأسئله اللي سألوهالها قالولها لقينا في لابتوب جوزك كارتون المحقق كونان يا  ترى جوزك كان بيتفرج عليه ليه ؟؟..انا مش بهزر ده سؤال من راجل المباحث ..واسئله بقه عاديه جوزك ايه علاقاتو وبيعمل مكالمات مريبه واللا لأ وكده ...المهم مرت الأيام وهيه عايشه في رعب لإنها مالهاش حد في السعوديه تواصلت مع الشركه بتاعته قالولها احنا منعرفش نخدمك بحاجه عشان دي المباحث بس احنا هنحاول معاهم انك تزوريه واننا نجلبك جواز سفرك عشان تسافري ...قعدت هناك 3 شهور في رعب لوحدها  وبعدين ادوها الجواز وسافرت وقالولها مفيش زياره ولا اتصال بعد 6 شهور كان أول اتصال لعبدالله بامه قالها انا كويس بس اوعو حد يجي السعوديه وهيه اسراء فين قالتلو اساء في مصر قال الحمد لله وانتهت المكالمه 3 دقايق بس ...طلو الفتره دي احنا بنحاول نتصل بكل جهات السعوديه عشان نعرف هوه مسجون ليه يكون الرد "موقوف ولسه في التحقيق وممنوع زيارة او اتصال " وده الحال لحد دلوقتي اتصل بينا بس مرتين كمان مره في العيد ومره رمضان كل مكالمه 5 دقايق ...بقالنا من بعد الثوره 20 وقفه عند السفارة السعودية نطالب بالإفراج عن المعتقليين المصريين في السعوديه بدون محاكمات او تهم واخر وقفه قبل رمضان السفير وعدنا ان كل المعتقلين هيرجعولنا يعيدوا معانا وطلب منا منجيش وقفات في رمضان ..نفذنا طلبو وهوه طبعاً طلع كداب ومرجعوش ولا حجاه ...ده مش حال عبد الله لوحدو ده حالمصريين كتيير هناك ...انا أسفه على التأخير واني طولت عليك :)







ده فيديو عن معتقلين مصريين موجدين في السجون السعودية












             والدة عبد الله بتتصل بالسلطات السعودية كل يوم وتتحايل عليهم تسمع صوته و تحاول تتطمن عليه لكن بدون فايدة وشوف كام ام وكام اب  بيحاولوا يوصلوا لولادهم المعتقلين في السجون السعودية ظلم او مجاملة لجهات امنية مصرية او يمكن تهمتهم اصلا انهم مصريين ...عبد الله في غيره كتير مصريين معتقلين... عبد الله زي مايكل نبيل بس الفرق انه مسجون خارج وطنه.


         الموضوع مبقاش سوء معاملة للمعتمرين المصرين (زي ما بيحاول يوصله لينا الاعلام المصري وانها مشكلة وهتتحل خلاص) القضية قضية معتقلين مصريين في السجون السعودية ومش هنسيبهم.




الحرية للمصريين المعتقلين في السجون السعودية



الاثنين، 22 أغسطس، 2011

كلام مش فاهمه

 وبيطول المشوار والعزم هيكفي


والقلب ليه ينهار وعدوي متشفي


عدي النهار ونهار مالقلب يولع نار


 لا الحب هداني ولا مية بتطفي


مازلتي يا دنيا علينا بتلفي


ولما نلعن ابوكي علينا بتتفي


يلعن ابو الدنيا دي ما خدنا منها شئ


كله فطريق فاضي وفيها عاش دوار


الدنيا ديه حوار ولا حد كان فاهمه


غزالة حاول يصيدها بس انكسر سهمه


والي ملكها في ايديه اتقال عليه مغوار


ولا تحسب القوة في من ملاه شحمه


شدي اديكي يا دنيا ساحب خلاص كفي


راغب عن الماليكي ممكن بقى تخفي؟


زفي الامل لغاويكي فزي قوام زفي


وراح ازفك عليه جايب كمان دفي


على دقة تترقصي وعلى دقه تغويني


لكن ما  هتنسيني ابدا فيوم التار


ويعدي بينا نهار والقلب يولع نار


ولا حب هداني ولا مية بتطفي


 ممكن بقى تخفي ممكن بقى تخفي





















السبت، 6 أغسطس، 2011

صباح الورد والقطران

صباحك ايه صباحك حان

صباح الورد والقطران
 
صباح الورد عالنيمان

ومن قهره يبات تعبان
 
صباح الضحكة والبسمة

لكل فقير يبات غلبان
 
صباح الفل عالمهزوم

صباح الورد لما يزوم
 
ولما فيوم يفوق ويقوم 

بشوكه ويجرح السلطان
 
صباحك ايه صباحك حان

صباح الورد والقطران
 
صباح الزفت في الميادين

صباح العسكر البايتين
 
فوسط ميدان صبح مسجون

بايد المنصر السجان
 
صباح الطين يا زفت الطين

بسببك ورد في الزنازين
 
عرفنا خلاص مين اللي يصون

عرفنا خلاص مين الخاينين
 
عرفنا خلاص بتوفي لمين

عرفنا كمان لمين خوان
 
صباحك ايه صباحك حان

صباح الورد والقطران
 
صباح معرفتلوش الوان

يروح وبيوصل الاخوان
 
يقوموا يطالبوا بالتغيير 

ومره يمارسوا في التكفير
 
كتير حوارات وسر ف بير 

مع العسكر سلام وامان
 
صباحك ايه صباحك حان

صباح الورد والقطران
 
صباحه ولسة ناس نايميين

  صباحه الاخوة سلفيين
 
فوسط مكان بيشغي دقون

صباحه اختى راحت فين؟
 
واخته التانية بالبيدات

فمصر في كل يوم تتهان

صباحك ايه صباحك حان
صباح الورد والقطران

صباحكم ايه يا مصريين

قولولي لسه ليه نايمين
 
ولما بقول يجوز خايفين

وافكر تاني في يناير
 
واقول ما الشعب كان ثاير

ومهما يطول علينا الليل
 
مسير الصبح بكرة يبان

ونرجع تاني الميدان
 
صباحك ايه صباحك حان

صباح الورد في الميدان

الخميس، 4 أغسطس، 2011

ليه يا كبير

الملهش كبير راح يشتريله كبير

طب قولي ليه يا كبير ليه العصابة كتير

ليه الخلايق عايشة وخايفة من الفواتير

وفلوسكوا جو بنوك متشالة بالقناطير

ويالي كنت كبير مين الجاب الهم

مين اللسه ايديه مليانة انهار دم

مين القتل الابن ومين البكى الام

ومين مشافش الغم غني كان ده ولا فقير

طب قولي ليه يا كبير ليه العصابة كتير

ليه الخلايق عايشة وخايفة من الفواتير

وفلوسكوا جو بنوك متشالة بالقناطير

الصحة مش مضونة والاكل فيه سرطان

ونعالجك احنا ازاي وانت البعيد غلبان

يعني نعاملك مرة قال يعني قال انسان

وازاي نعالج بره حرم سيادة الوزير؟

طب قولي ليه يا كبير ليه الغلابة كتير

ليه الخلايق عايشة وخايفة من الفواتير

وفلوسكوا جو بنوك متشالة بالقناطير

قولي كمان يا كبير طب فين اراضي الدولة

سرقوها وانت بتشرف دول لصوص وعتاولة

وسابوني قاعد عاطل عالقهوة بلعب طاولة

وانا لما اقول حرامية ما ينوبني غير تكدير

طب قولي ليه يا كبير ليه العصابة كتير

ليه الخلايق عايشة وخايفة من الفواتير

وفلوسكوا جو بنوك متشالة بالقناطير

هقولك انا يا كبير ليه العصابة كتير

علشان كبيرهم انت وبيهم انت كبير

وبلدنا منكم لازم محتاجة للتطهبر

ده زمنكوا زمن السرقة وزمنا زمن الخير

ده زمنكوا زمن السرقة وزمنا زمن الخير

الأحد، 24 يوليو، 2011

وديني لسه بحبها

وكأنها فوق الخرايط بنوته مكشوف ضهرها

وعجيب قوى النيل النازل راسم ضفيرة شعرها

على ضهرها موصول يغني وف حبها الحان

باصول يا نيل لو جيت كمان فيوم تفيض من حسنها

فرع يا نيل وشق ارض الطيبين واضحكلها

وفوقت فجر يكون جميل وشوشها بس وقولها

ان ابنها حالف بايده فيوم ليكسر سجنها

انا الرافض ان حبى ليكي يبقى بس شعر

ده حتى ولا مليون قصيدة فيوم هتوصف وصفها

يا مصر مين قولي الخاين ومين بيسرق السنين

مين الخان ورد الجناين وخلى نيلك صار حزين

ومين بيفدي بدمه ارضك ومين على عرضك امين

ومين في ارضك كان بيزرع ومين بينهب كنزها

يا مصر اوعى فيوم تخافى ابنك مازال عالظلم ثاير

ولما مسكه في مرة غادر وطفى على ضهره السجاير

صرخ بصوته انا مش بخاف وديني هفضل احبها

 واديني برده بحبها وفكرت فيها وشفتها

 كانها فوق الخرايط بنوته مكشوف ضهرها

 وعجيب قوي النيل النازل راسم ضفيرة شعرها

على ضهرها موصول يغني وف حبها الحان

 باصول يا نيل لو جيت كمان فيوم تفيض من حسنها

باصول يا نيل لو جيت كمان فيوم تفيض من حسنها




 
اهداء لصديقى واخويا  وصديق الطفولة
مصطفى محمود 



الخميس، 14 يوليو، 2011

الصباع

ويعدي بينا الوقت و تتقلب الاوضاع

كاره سكوتي وصمت بيسكن الاوجاع

رافض اعيش مسجون ولا دم اخويا اخون

وعقلي مش مركون وعيوني لسه وساع

شايف بعيني الغدر حاسس بناس بتخون

مسجون يا قلب الفجر دم الشهيد اتباع

شخط الشويش بزعيق وسقفوا الاتباع

كان الشويش محبوب لكن طلع له صباع

بصباعه كان بيشاور ويحذر الثوار

لكن محدش خاف والدنيا ولعت نار

يا شعب يا جبار نازل على الميادين

على كتفنا الاكفان نازلين ومش خايفين

يا بياعين الدم روحو لشويشكم قولوا

 ده  الطلع له  صباع الشعب يقطعهوله

 ده  الطلع له  صباع بكرة هنقطعهوله

الاثنين، 11 يوليو، 2011

يسقط عصام شرف ولا يسقط المجلس العسكري ؟؟

    دلوقتي احنا داخلين في حرب لو انتهت هنبتدي في حرب  تانية سهل جدا نقول يسقط يسقط عصام شرف خصوصا ان كل الناس وانا منهم مخنوقين منه جدا للسلبية اننا شايفينها وبننقسم لقسمين ناس بتقول ده متواطئ وناس بتقول لا هو مضغوط عليه مش عارف يعمل حاجة وفي الحالتين بنوصل لنفس النتيجة مطالب الثورة لسة زي مهي متحققتش واهالي الشهداء مخدوش حقوقهم والمصابين لسة بيشحتوا علاجهم يعني هنفضل نحارب ونقول يسقط عصام شرف وبعد ميسقط عصام شرف نحارب ضد المجلس العسكري.
   في حربنا ضد المجلس العسكري هنكون منهكين جدا وهيظهر المجلس العسكري بمظهر البطل لما يقول احنا مشينا عصام شرف واستجبنا لطلبات الثوار وهتطلع ناس تهلل وتقول الله اكبر الجيش حمانا تاني  خصوصا الاعلام الم....  بتاعنا وهيقع ناس كتير من المتضامنين معانا بحجة اننا نصبر شوية حصل تغير اهه وهنشوف الوزارة الجديدة  هتعمل ايه ولما تقول يسقط المجلس العسكري  مش  هيكون التضامن معانا زي الاول.
   طيب دلوقتي نعمل ايه يعني والواحد دمه بيغلى من الخطابات البيقولها شرف  كل شوية ده طيب دلوقتى المجلس العسكري بيلعب معانا لعبه حلوة قوي زي الكان بيلعبها مبارك بيعطش الناس قوي للتغيير وبتغير بسيط تحصل بعض الانقسامات بين الناس بقى نكمل الاعتصام لحد منعمل مجلس رئاسي ولا نستني على الوزارة الجديدة الهيعملها المجلس برده.
   رأيي الشخصى-مش من ابتكاري انا سمعته بس اقتنعت انه ممكن يكون فعال- اننا نلاعب المجلس العسكري برده ونطالبه بتفويض صلاحياته لعصام شرف اعتقد هتكون ضربة جامدة للمجلس العسكري وهنساند عصام شرف لو هو كويس فعلا هيحس ان الناس بتسانده وهتشجعه  كمان وممكن ساعتها يصرح بالضغوط ال عليه من المجلس العسكري  ومش هيكون في فرصة للمجلس العسكري انه يقول الناس شالت رئيس الوزراء الكانو بيطالبوا بيه في الميدان ومش هنشمت فينا حزب الكنبة الهيكون اول سؤال غبي يسألوه : هو الناس الفي التحرير دول عايزين ايه بقى؟؟؟ قد يقول البعض عليا فلول عشان  عندي وجهة نظر عصام شرف هو الحل فيها لكن انا مش مضطر اني ادافع عن نفسي قدام اي حدد ده وجهة نظر وانا اقتنعت بيها .

الجمعة، 1 يوليو، 2011

انسان

لما سمعت اغنية انسان بتاعة حمزة نمرة وفكرت ايه هو الانسان؟ ممكن يكون الانسان هو لحم ودم وشوية اعضاء متركبة في بعض كدة ,او ممكن يكون الانسان انسان بتعامله  مع باقي البني ادميين الزيه ,وممكن برده يكون الانسان هو طريقة تفكيره بعقله البيمثل شخصيته واسلوبه في التعامل مع كل المواقف, الانسان برده هو مجموعه من المشاعر والعواطف من كره وحب وحزن وفرح وتعاطف الانسان فيه الحنان وفيه الغضب .
لما تيجي تفكر في ميدان التحرير وتشوف الناس الفيه  تلاقي الانسان في الميدان بيتعامل مع كل انواع البني ادمين  (البلطجية الثوار المندسين الجيش الشرطة الجواسيس الاجانب البياعين....الخ الخD:) , الانسان في التحرير  بيفكر في كل حاجة سواء بقى تفكيره بيوصله لحلول او مبيوصلش لحاجة بس يكفيه (شرف التفكير) زي التفكير في مستقبل مصر التفكير هيعرف يروح ولا هيتخطف من العسكر طيب هعرف اعتصم ولا هلاقي قنابل الغاز نازلة على دماغي  وانا  نايم وحجات كتييييير كمان بيفكر فيها كل واحد في التحرير.
ولما نيجي نفكر في الانسان كمجموعة من المشاعر هتلاقي كل حاجة موجودة الحمد لله في التحرير, الانسان هناك بيحب كل الناس البتهتف جنبه وتسانده وبيكره قوي البيهاجمه من غير ما يعرف مطالبه وبيكره هروات الامن المركزي و كهربة الشرطة العسكرية,بيفرح قوي بحضن الميدان وبمنظر الناس وهي جاية من كل الشوارع عشان يهتفوا بصوت واحد ,بيحزن لما يفتكر اخوه الشهيد الكان جنبه واستشهد على دراعه ويحزن اكتر لما يلاقي ام الشهيد بتقول هاتولي حق ابني وهو من جواه بيحلف انه مش هسيب دمه يروح هدر,الانسان في التحرير فيه حنان يساع الارض والزرع والناس واخوه البياخده وراه على الموتوسيكل ويلحقه قبل ميتخنق من الغاز وساعات بيساع الخنازير البتضربه بالغاز لما يقعوا تحت ايده وهو بيقول: "سلمية" ,لكن غضبه ممكن يحرق و يدمر كل اليقف قدامه (نصيحة اتقي غضب الناس بتوع التحرير @:)....

من وجهة نظري في الميدان بتجتمع فينا كل معاني الانسانية بعد مكان الناس عاشت سنين قربت تنسى يعني ايه يكونوا بني ادميين  لان في التحرير الانسان بجد انسان.

نور العقاد

الاثنين، 27 يونيو، 2011

في المحكمة

في المحكمة الدنيا فالتة ومحكمة
...وناس كتير متأزمة
وناس بتهتف وناس بتحدف ظباط بتضحك انما
في ام كانت قاعدة تبكي رافعة ايديها للسما
بتقول يا رب.. يعني الغلابة ملهمش حد
ونروح لمين
وشباب حزين بالصوت بيهتف ويقول يا شرطة..........
قلتلها ياما اوعي تبكي..وحق اخويا انا مش هسيبو
ولو وراه مية جيش وشرطة انا راح اعيش علشان اجيبو
ولجل حقه نموت كمان ونحصله والحق نفديه بالدما

الاثنين، 20 يونيو، 2011


نضارة الشمس

اصحى يا باشا واسمعني
واقلع نضارة الشمس
خوفي مبقاش يمنعني
وبكرة مش زي الامس
بكشك مبقاش يخدعني
ضربك مبقاش يوجعني
حقي مش هيروح مني
بقى غير قابل للمس
تظلم اظلم وهحاسبك
لو مهما تكون مغرور
ولا عمري راح ارضا بظلمك
وبحقي عليك منصور
تسرق اسرق وهجيبك
وبصوتي راح اقطع ايدك
وبصرخة هتفيض مني
وكرهت خلاص الهمس
اصحى يا باشا واسمعني
واقلع نضارة الشمس
خوفي مبقاش يمنعني
وبكرة مش زي الامس
بكره مش زي الامس

     نور العقاد                                                           

الأحد، 19 يونيو، 2011

انا بكرهك


اضرب كمان
واجلد كمان
مهو لسة في فضهري مكان
سابوه زمايلك فيه عشان تقدر تزود الامتهان
عذب وزود فينا ضرب
انا عارف ان ملكش قلب
انسان بتكره الوجود والغدر فيك
ده مش جديد
سيد بلال ده كان شهيد
فاكر كمان خالد سعيد؟؟
الغدر فيك عمال يزيد مش منتظر منك امان
كم شاب كان بيروح شهيد
ويموت بايدك في الميدان
ولا حد فيهم فوقك وده دم اخويا بيندهك
انا بكرهك
انا بكرهك
انا بكرهك انا بكرهك


       نور العقاد