views

الخميس، 7 فبراير، 2013

فلان بس تاني

فلان الفلاني ال كان يومها جنبي.. ساعة لما بداوا في ضرب الرصاص

فلان ال وقت اما ظبط اموره.. فقال يا ابن عمي نروح خلاص

فلان ال خوني لما خالفته ...عشان المقاعد عشان برلمان

فلان ال اصبح لحسني خليفته ...يبوس ال عراكي جو الميدان

فلان ال يمنع كلامي بكمامة ..عشان بس بهتف يا عسكر هتمشي

فلان ال لبس لشعبي العمامة ..."نعم" كلمته بس هي التمشي

فلان ال واقف فوسط المظاهرة... قصاد برلمانه يقول تيجي بكره

فلان ال قال اني خاين بأجره ..عشان بلدي تولع بدون اي فكره

فلان ال قال اني صاحب قزايز ...فوسط الميدان لازم اولع بجاز

فلان الفلاني ال للسلطة عايز..ومات لاجل يوصل صحابي العزاز

فلان ال يكذب في قلب البرامج ...حقوقكم امانة تكون عالكتاف
 
فلان ال نزل جيوشه الجعانة...للحمي عشان يحمي قصره أما خاف

فلان ال فجأة نزل غدر بيا...ويحلف بربه مفيش طلقة فيا

فلان ال فاكر هننسى القضية ....فبكرة هتنزل تشيله الألاف




معارضة لرائعة مصطفى ابرهيم "فلان الفلاني "

الجمعة، 11 يناير، 2013

بيني وبين كتابي

 بس لو تعرف عذابي وانت بيني وبين كتابي

والورق جامع ما بينا افتكر هعرف اذاكر

حبك انت لقلبي حاصر قبل ما اعمل يوم حسابي

وافتكر ايام زمان وافتكر كل الكان

حب ساكن في الحروف واما تجمعنا الظروف

فجاة ترمينا لطريق الف صدفة حاوطها خوف

كنا برده كتير نكابر قولنا هنخبي المشاعر

والحكاية شوق كبير وسط حاضرنا و ماضينا

يا حبيبي الدنيا لينا والغرام زي الجنينة

لما يرويه شوق قلوبنا يطرح العشق يداوينا

يتفهم معنى البينا بعد لما كان طلاسم

لما بمسك في الملازم وافتكر نظرات عيوننا

كل كلمة تقول ما بينا ان حبك ليا لازم

قال بيسأل لسة فاكرة؟؟ ايوة طبعا بكرة بكرة

نلتقي في نفس المكان دغري بعد الامتحان

بس سيبني اعرف اذاكر قبل ما يئون الاوان

اوعى تظهر وسط كتبي والملازم والمساطر

ولا اقولك زيد عذابي وانت بيني وبين كتابي

وانت بيني وبين كتابي وانت بيني وبين كتابي

الخميس، 18 أكتوبر، 2012

خطاب الغرام

 و بعد السلام المعطر بورد

أحييك يا صاحبي أحييك بجد

وبتمنى دايما تعيش في سلام

وتقبل صداقتي ولا تقول لحد

عزيزي المبجل بقول من جديد

نسينا الارامل و ام الشهيد

نسينا الماتوا هناك عالحدود

نسينا الفاتوا نسينا الجدود

نسينا المصايب وبحر البقر

ذنوبكم بسيطة وراح تغتفر

وبتمنى تسعد وتفضل سعيد

وببعت كلامي ال بيخر شهد

وبتمنى دايما تعيش في سلام

وتقبل صداقتي ولا تقول لحد

وببعت سفيري وده الاسمه سالم

حبيبي وكفاءة ودايما مسالم

ودايما يوافقك في كل الأمور

وممكن يبرر ولو كنت ظالم

ولو جيت تشم الخطاب فيه عطور

عشانك صديقي ولا تقول لحد

ولو راح تسيح ولو راح تقول

هقول للعيال الصيع بوروتوكول

عيال غلباوية يجيبوا الصداع 

بيهروا في تويتر ومليون بتاع

لكن عندي برده جيوش من ماغول

تبرر كلامي وتنزل دفاع

واخر كلام اني ارجو القبول

وما تشتهي بدعي انك تنول

تدوم المحبة ما يوم تختفي                

وامضائي واضح                                               

                                 صديقك وفي


                                       
الكاريكاتير للفنان أحمد نادي...اضغط للإنتقال لصفحته على الفيس بوك

الخميس، 6 سبتمبر، 2012

ابن الكفاح

وازاي هتتعلم تطير وانت الفقير وبدون جناح

ويفوت صباح ..ويعود صباح

...عقلك مازال نازل صياح

مهموم وقلبك صار  حزين واقف على سور السطوح

وزاي هتتعلم تطير

وانت الفقير وبدون طموح

وتعيش وفاكر يوم تعيس رغم الهموم ليه انكشاح

اتوبيس غلاسة يعدي كل نهار عليك  نفس المعاد

وسعات يدوسك مرتين وان عاد يطرطش مرة طين

لو عشت طول عمرك حزين هيفوت وبرده تموت حزين

والصبر مالي قلوب كتير بيزيد وعشش من زمان

خفاش يرفرف في الظلام عالنور بيحلف لن يبان

والفرح قالوا كمان حرام مولود ولكن كان سفاح

لو عشت في الكهف لسنين هتموت وناسي ايه البراح

وغيابة الجب العميق هتزوره شمس الدنيا يوم

وتنور الاركان كمان و وببسمة تلقى الحزن راح

اوعاك لتستلم فيوم او يوم تقول خانني الزمان

احزان و قلبك ياما شاف  وان مر خاف ظلم الغيوم

بتعود وتفرش كل شئ بنور كتير شمس الصباح

وازاي هتفشل يوم تطير ولو فقير وابن الكفاح

ازاي هتفشل يوم تطير ولو فقير وابن الكفاح


الجمعة، 17 أغسطس، 2012

حدث بالفعل..الكلب متهم حتى تثبت براءته

الموقف ده من طرائف العشرة الاواخر  حصل من فترة كبيرة لما افتكرته دلوقتي فضلت اضحك و بيوضح العنف الممنهج في جهازالشرطة:D:D  ...في ليلة من من العشر الاوخر في رمضان كان بعض الاصدقاء منهم صديق في كلية الشرطة  بيتجولوا في طرقات القاهرة الجديدة واذا  بهم يتسائلون هل هي ليلة القدر  ولا مش هي -  ويقال ان في ليلة القدر  الكلا ب لا تنبح -  فلما سمع كدة ال في كلية الشرطة   مرة واحدة بتلقائية  مسك طوبة  وراح حدفها على الكلب فشخه ..طبعا الكلب مش نبح بس ده صرخ …وفي تعبير مضحك ومعبر قال  " شوفتم  اهه هوهو ده مش ليلة القدر " هي القصة كوميدية لكن ممكن تشوف فيها اسلوب التفكير عند رجال الشرطة  خصوصا في وقت استخراج الاعترافات  من المتهمين :D

الثلاثاء، 31 يوليو، 2012

شمس يوم تاني

وتشرق شمس يوم تاني وانا قاعد بغنيلك

ولا بيعجبني صوت ضحكك ولا عاجبني لون نيلك..

لكني كتبت احزاني في ورقة فيها عنواني

بقولك فيها انا خايف يكون مجدك فيوم فاني.

.وشعبك لا يزال شايف جيوش سعرانة قتلاني..

.ويسكت رغم احزانه وبييبوس يد سجانه

يا دم الشهدا حاربهم ولو هنساك ما تنساني

...انا ما املكش غير نفسي انا الخانني اخواني.

.وهنتخبه عشان مايعيش ولا ينجحشي سجاني

لامتى هبقى انا مجبور اعيش والمر سقياني

 ..وحالي كل يوم بيسوء وبعد السوء يسوء تانى

يا جاحدة يالي قلبك طوب في بعد الدم شئ تاني!!؟؟

..عشانك يروي اراضيكي..ولو زعلانة براضيكي.

.لامتى هعيش و شاريكي وبرده لسة بايعاني

عشانك شوفي كام درويش في حبك لسة بيعاني

وناس عايشنها بالتكويش كروشهم لسة بلعاني

وقال بيقولو عنك ام كرهت انا  أم أحزاني

انا راح اعيش كدة فيكي عشان في معنى انساني

بشوفه في قلب حواريكي و ناس شقيانة بتعاني

وبرده راضية بالعيشة وبكره تثور ومن تاني

هيغرب ظلمك الممدود ومنه بايدي راح اشيلك

وتشرق شمس يوم تاني وانا قاعد بغنيلك

وراح يعجبني صوت ضحكك وراح يعجبني لون نيلك


الخميس، 5 يوليو، 2012

مين انا؟؟


مين انا.. مين انا ؟؟..انا المحروم م الهنا

مين انا... مين انا؟؟ انا المنسي من سنة

انا الموعود بالعذاب...انا المظلوم م الكلاب

انا السهران وسط ليل لا شفت نومة او سِنة

مين انا مين انا؟؟ انا المحروم من الهنا

مين انا مين انا؟؟ انا المنسي من سنة

انا ال بس جالي نوم فوقت ما قتلني  التعب

ولما بصرخ مالهموم يقولوا معدوم الأدب

انا ُمسمى بلطجي واستنى عدل يقولوا جي

و ندل تاني قال حكَم حكِم كلابه في امرنا

مين انا مين انا ؟؟أنا المحروم من الهنا

مين انا مين انا؟؟ انا المنسي من سنة

أنا الحبسني  ما يختشيش بقيت مُحاكَم عسكري

انا ال من  جَلد الشاويش جِلد ضهري بينبري
 
والتهمة؟؟ قالوا بهين مشير وبجيب لأبوهم بعكننه

اقولها تاني مين انا ؟؟ ولا فهمتم قصدنا؟

لسة بسأل برده مين؟...لسة بتسأل مين انا؟

انا ال سألت العدل فين؟؟.. قالوا ف يناير اتقتل

لسة بتسال برده مين!! لسة بتسال ايه حصل!!

انا اسمي سامبو ...او محمد .....انا كل صامد  معتقل

انا كل صامد معتقل

 انا ال لسة معتقل