خطاب الغرام

 و بعد السلام المعطر بورد

أحييك يا صاحبي أحييك بجد

وبتمنى دايما تعيش في سلام

وتقبل صداقتي ولا تقول لحد

عزيزي المبجل بقول من جديد

نسينا الارامل و ام الشهيد

نسينا الماتوا هناك عالحدود

نسينا الفاتوا نسينا الجدود

نسينا المصايب وبحر البقر

ذنوبكم بسيطة وراح تغتفر

وبتمنى تسعد وتفضل سعيد

وببعت كلامي ال بيخر شهد

وبتمنى دايما تعيش في سلام

وتقبل صداقتي ولا تقول لحد

وببعت سفيري وده الاسمه سالم

حبيبي وكفاءة ودايما مسالم

ودايما يوافقك في كل الأمور

وممكن يبرر ولو كنت ظالم

ولو جيت تشم الخطاب فيه عطور

عشانك صديقي ولا تقول لحد

ولو راح تسيح ولو راح تقول

هقول للعيال الصيع بوروتوكول

عيال غلباوية يجيبوا الصداع 

بيهروا في تويتر ومليون بتاع

لكن عندي برده جيوش من ماغول

تبرر كلامي وتنزل دفاع

واخر كلام اني ارجو القبول

وما تشتهي بدعي انك تنول

تدوم المحبة ما يوم تختفي                

وامضائي واضح                                               

                                 صديقك وفي


                                       
الكاريكاتير للفنان أحمد نادي...اضغط للإنتقال لصفحته على الفيس بوك

ابن الكفاح

وازاي هتتعلم تطير وانت الفقير وبدون جناح

ويفوت صباح ..ويعود صباح

...عقلك مازال نازل صياح

مهموم وقلبك صار  حزين واقف على سور السطوح

وزاي هتتعلم تطير

وانت الفقير وبدون طموح

وتعيش وفاكر يوم تعيس رغم الهموم ليه انكشاح

اتوبيس غلاسة يعدي كل نهار عليك  نفس المعاد

وسعات يدوسك مرتين وان عاد يطرطش مرة طين

لو عشت طول عمرك حزين هيفوت وبرده تموت حزين

والصبر مالي قلوب كتير بيزيد وعشش من زمان

خفاش يرفرف في الظلام عالنور بيحلف لن يبان

والفرح قالوا كمان حرام مولود ولكن كان سفاح

لو عشت في الكهف لسنين هتموت وناسي ايه البراح

وغيابة الجب العميق هتزوره شمس الدنيا يوم

وتنور الاركان كمان و وببسمة تلقى الحزن راح

اوعاك لتستلم فيوم او يوم تقول خانني الزمان

احزان و قلبك ياما شاف  وان مر خاف ظلم الغيوم

بتعود وتفرش كل شئ بنور كتير شمس الصباح

وازاي هتفشل يوم تطير ولو فقير وابن الكفاح

ازاي هتفشل يوم تطير ولو فقير وابن الكفاح

حدث بالفعل..الكلب متهم حتى تثبت براءته

الموقف ده من طرائف العشرة الاواخر  حصل من فترة كبيرة لما افتكرته دلوقتي فضلت اضحك و بيوضح العنف الممنهج في جهازالشرطة:D:D  ...في ليلة من من العشر الاوخر في رمضان كان بعض الاصدقاء منهم صديق في كلية الشرطة  بيتجولوا في طرقات القاهرة الجديدة واذا  بهم يتسائلون هل هي ليلة القدر  ولا مش هي -  ويقال ان في ليلة القدر  الكلا ب لا تنبح -  فلما سمع كدة ال في كلية الشرطة   مرة واحدة بتلقائية  مسك طوبة  وراح حدفها على الكلب فشخه ..طبعا الكلب مش نبح بس ده صرخ …وفي تعبير مضحك ومعبر قال  " شوفتم  اهه هوهو ده مش ليلة القدر " هي القصة كوميدية لكن ممكن تشوف فيها اسلوب التفكير عند رجال الشرطة  خصوصا في وقت استخراج الاعترافات  من المتهمين :D

شمس يوم تاني

وتشرق شمس يوم تاني وانا قاعد بغنيلك

ولا بيعجبني صوت ضحكك ولا عاجبني لون نيلك..

لكني كتبت احزاني في ورقة فيها عنواني

بقولك فيها انا خايف يكون مجدك فيوم فاني.

.وشعبك لا يزال شايف جيوش سعرانة قتلاني..

.ويسكت رغم احزانه وبييبوس يد سجانه

يا دم الشهدا حاربهم ولو هنساك ما تنساني

...انا ما املكش غير نفسي انا الخانني اخواني.

.وهنتخبه عشان مايعيش ولا ينجحشي سجاني

لامتى هبقى انا مجبور اعيش والمر سقياني

 ..وحالي كل يوم بيسوء وبعد السوء يسوء تانى

يا جاحدة يالي قلبك طوب في بعد الدم شئ تاني!!؟؟

..عشانك يروي اراضيكي..ولو زعلانة براضيكي.

.لامتى هعيش و شاريكي وبرده لسة بايعاني

عشانك شوفي كام درويش في حبك لسة بيعاني

وناس عايشنها بالتكويش كروشهم لسة بلعاني

وقال بيقولو عنك ام كرهت انا  أم أحزاني

انا راح اعيش كدة فيكي عشان في معنى انساني

بشوفه في قلب حواريكي و ناس شقيانة بتعاني

وبرده راضية بالعيشة وبكره تثور ومن تاني

هيغرب ظلمك الممدود ومنه بايدي راح اشيلك

وتشرق شمس يوم تاني وانا قاعد بغنيلك

وراح يعجبني صوت ضحكك وراح يعجبني لون نيلك

مين انا؟؟

مين انا.. مين انا ؟؟..انا المحروم م الهنا

مين انا... مين انا؟؟ انا المنسي من سنة

انا الموعود بالعذاب...انا المظلوم م الكلاب

انا السهران وسط ليل لا شفت نومة او سِنة

مين انا مين انا؟؟ انا المحروم من الهنا

مين انا مين انا؟؟ انا المنسي من سنة

انا ال بس جالي نوم فوقت ما قتلني  التعب

ولما بصرخ مالهموم يقولوا معدوم الأدب

انا ُمسمى بلطجي واستنى عدل يقولوا جي

و ندل تاني قال حكَم حكِم كلابه في امرنا

مين انا مين انا ؟؟أنا المحروم من الهنا

مين انا مين انا؟؟ انا المنسي من سنة

أنا الحبسني  ما يختشيش بقيت مُحاكَم عسكري

انا ال من  جَلد الشاويش جِلد ضهري بينبري

 

والتهمة؟؟ قالوا بهين مشير وبجيب لأبوهم بعكننه

اقولها تاني مين انا ؟؟ ولا فهمتم قصدنا؟

لسة بسأل برده مين؟...لسة بتسأل مين انا؟

انا ال سألت العدل فين؟؟.. قالوا ف يناير اتقتل

لسة بتسال برده مين!! لسة بتسال ايه حصل!!

انا اسمي سامبو ...او محمد .....انا كل صامد  معتقل

انا كل صامد معتقل

 انا ال لسة معتقل

ملعون ابو السكوت

ملعون ابوه الكلام ملعون ابوه السكوت

ملعون أبوها الحياة ملعون ابوه الموت

مين الوسط الظلام بالنور اوام هيفوت؟

العشق؟؟....لا مش حرام

والكره مولود غلام

..يكبر في قلبي غليل..مكتوم في حلقه الصوت

على فمة مربوط لجام..على ضهره رسمة سوط

لامتى كرهي فقلبي يقبل يعيش مكبوت

وانا العايش عليها لكني مش عايش

انا الحايش كلامي بهروب من الواقع ..

و الدم بعد اما يغلي يرجع يكون ساقع

لما الرصاص للقلب بلخوف يكون قامع

سامعني يالي هناك ولا انت مش سامع؟

فاكر كلامك زمان "دم الشهيد راجع" ؟

تقبل تعيش في سكوت؟

......تقبل تعيش راكع؟

جاوب قوام الرفيق وصوته مش خافت

  ولا من نيران وحديد يوم القلوب خافت

ماسك فإيده الطوب يصرخ  بعلو الصوت

.من قبل ما نعيش عبيد أتمنى نلقى الموت

من قبل ما نعيش عبيد اتمنى نلقى الموت

لأجل ما تتشكيش في البوسة

علشانك..
علشانك هحلق دقني كمان..لاجل ما تتشكيش في البوسة
وازابعد عنك..قولي...
وبعيد عنك حوستي انا حوسة
وازاي راح اقرب يا حبيبتي..وحياتي لا تزال منحوسة
والعشق؟...
العشق في قلبي اهو مرطرط...ولكنه بدونك محض خيال
علشانك ابقى ظابط طيار..ومهندس مدني كمان بقال
وعشانك راح اجيبلك شقة ...بعد جوازنا هنملاها عيال
أ ُمال...ما انا اصلا غرضي شريف
وحياتنا هتبقى كباب في رغيف 
لو تزهق نفسك منه فيوم...هنحلي كمان بالبسبوسة
وفوقت ما تطول دقني كتير..ويزيد الشوق ويمر زمان
علشانك هحلق دقني كمان...لاجل ما تتشكيش في البوسة

كله ماشي

كله  ماشي ..كله ماشي..كله ماشي ..كله ماشي

كله ماشي كان زمان ضمن اعداء النظام.

رغم انه فحضنه بايت بس حضن بدون وئام

كان يقوم وينام يقاوم  بس لما يدقوا بابه

كان يقوم فرحان جنابه يقوم مصرح كله ماشي

 كله ماشي..كله ماشي..كله ماشي..كله ماشي

وبصراحة يا جماعة كله ماشي ده جماعة

قالوا ده مثال للشجاعة  قالوا يكره الوضاعة

بس لما هل سيده وشخللت سلطات في ايده

كله ماشي مد ايده  راح مع العسكر ماجاشي

كله ماشي...كله ماشي..كله ماشي..كله ماشي

كله ماشي قال يا سيدي ان حق الشهدا راجع

مهما سلطة تزيد في ايدي احلى اخلاقي التواضع

كله ماشي يا عزيزي للبيادة دغري راكع

يشكر السفاح بشدة ولو تفكر يوم تخالفه

تبقى ملحد تبقى كافر تبقى ابن كلاب خسيس

لو توافقه تبقى(( شاطر))  يرضى تترشح رئيس

والسبب جاهز تملي كله ماشي ما اختشاشي

كله ماشي..كله ماشي...كله ماشي..كله ماشي

كله ماشي يا جنابك ايوة انت حزب وطني

انت خاين للأمانة خنت كل شهيد في وطني

لسة بلعن كل واحد م الميدان غادر وسابني

كل غادر كل خاين كل من قال كله ماشي

كله ماشي كله ماشي كله ماشي كله ماشي

كيف تنتصر الثورة في سبع خطوات ..بين قوسين ..دعوة للإنقسام

طبعا كلنا شايفين البيحصل اليومين دول  والناس البتقولك طيب ما نهدى شوية ونصبر عشان نبني ..وكفاية مظاهرات بقى واعتصامات وان لمجلس يا جماعة يا جماعة  نيته يسلم السلطة وكلها كام شهر وننتخب رئيس و نبني بلدنا بقى .
تيجي تتكلم عن الاخوان يقولك مالك بالاخوان انت عايز تنقلب على الديمقراطية ولا ايه دول الناس الاختارهم الشعب تقولوا بس دول بيعاملوا المجلس زي ما يكون ماسك عليهم افلام سكس يقولك دول بيستغفلوا المجلس العسكري واول ما يجي رئيس هيحاكموهم ويفشخوهم.
طيب يا عم بص بقى أنا هصبر على المجلس وهصبر على الاخوان طيب وبالنسبة للشرطة الفشخانا وبتقتل فينا ومش هقولك مطيرة النوم من عينا هيا مطيرة عينا نفسها ....مش المفروض نطهر الجهاز الوسخ ده  يقولك طبعا نطهره ونطهر ابوه بس نصبر شوية عايزين شوية أمن في البلد اديك شايف حالة الإنفلات الامني وبكدة مفيش استثمارات هتدخل البلد ومش هنلاقي ناكل ومش بعيد تقوم ثورة جياع تاكل الاخضر واليابس.
من هنا بقى جت في بالى فكرة كنت سمعتها من صديق و حاولت اشتغل على تطويرها وهي  مبدأيا احنا هنحدد مشكلتنا ومشكلتنا هي الكنب الجيش الشرطة الاخوان والسلفيين والسياسيين الم.... ولا بلاش الادب حلو برده ....ما علينا الناس ده كلها معطلة الثورة طيب الهنعمله بكل بساطة هو الأتي :-
                                   1- هنجمع الناس كلها المع الثورة والتغيير والحرية (ايوة حرية يعني امك تقلع الحجاب لو عايزة) وناخد معانا الجياع والناس الشكلها غلط المش عاجبين حد دول واطفال الشوارع كمان
                                   2-هنتفق مع العالم الواقفة في وش تحقيق مطالب الثورة من الشعب والذكرتها من شوية ولو عايز تضيف ليهم حد انا نسيته هفتحلك قوس اهه (......) حط فيه الانت عايزه...المهم هنتفق معاهم خدوا نص البلد سواء يمين النيل او شمال النيل وهناخد احنا المساحة الاصغر دلوقتي ولوعايزين نقسمها بالعرض نقسمها بالعرض وخدوا انتوا الجزء ال فيه قناة السويس كمان عشان يبقى عدانا العيب..وقزح.
                                  3- بعد ما نقدر ناخد نص من البلد ونجمع فيه الثوار والمتضامنين معاهم والمصالحهم مع الثوار هنعمل نهضة شاملة و إحنا بقى مش بتوع لجان و توصيات وروتين وبيروقراطية بنت وسخة ..احنا هنعمل الشايفينه صح علطول وهنوصل اسرع .خليلهم هما بقى الاخوان و المجلس على ما يعملوا الدستور ويعدلوا اللوايح والقوانين نكون عملنا بلد تانية في النص بتاعنا.
                                 4 - وده أهم خطوة وهي تكوين جيش عملاق  تفوق قدرته قوة الجيش الاسرائيلي و ده وهنلاقي اليساعدنا وإحنا بقينا دولة متطورة ممكن مانحتاجش اي مساعدات ونصنع سلاحنا بنفسنا.
                                 5-  هنحارب النص ال فيه الاخوان .... أيوة مستغرب ليه ده بلدنا ومش هنسيبها للإخوان والعسكر مهما استنينا مهما صبرنا مش هنسيبهالهم ..وطبعا هيحاربونا بالجيش بتاعكم وطبعا نتوا متوقعين نتيجة أي حرب ضد جيش طنطاوي.
                                6- هننشر العدل في مصر كلها هننشر الحرية مش هيبقى في فروقات بين الناس الا بالجهد والعمل كله واحد قدام القانون دولة  يلاقي كل الناس  فيها العيش ويتنفسوا الحرية و ينعموا بالعدالة الاجتماعية...بس الفرق بينا وبينهم احنا مش هنسجن حد مش هنعذب حد احنا هنفرض واقع جميل في البلد وال مش عاجبه يروح قطر ولا السعودية أو أمريكا....وال فيزا علينا كمان.

                               7- الخطوة السابعة ده  انا هسيبهالكم بقى  تقولوا اقتراحتكم  وأنا واثق في ابداعكم

والله الموفق والمستعان

الأرض مابتنساش

                       بنعدي دايما في اماكن كتير وبنسيب فيها أثار مننا وكل واحد حسب شخصيته واحد بيسيب زبالة واحد بيشيل الزبالة وبيسيب نقطة عرق وهو بيشيل الزبالة واحد بيكتفي لمسة بيلمسها لجدار لسور وهو بيسند عليه لكن محدش بيعدي على مكان ما بيسيبش فيه حاجة.
                      لما تفكر كدة شوية وتشوف انت سيبت ايه في كل مكان رحت فيه وتشوف الشهيد ساب ايه هتلاقي الشهيد ساب اغلى شئ بيتمسك بيه الانسان و هو روحه والمصاب ساب دم البتشربه الارض و حد تاني  بيسيب جلده في الارض من سحل الامن المركزي والشرطة العسكرية  .
                  ساعات بفضل افكر انا سيبت ايه في كل مكان بفكر والمكان هيفتكرني بإيه؟.. لحد النهاردة وانا معدي في محمد محمود وحسيت انا لارض بتكلمني وبتحكيلي الحصل عليها والخميرة والميكو جيل وترجيع الناس عليها من الغاز-معلش قرفتكم- وادي الحتة الهناك ده بتصرخ من الدم الشربته ولحد دلوقتي مجاش حق الدمه سال وهناك ارض بتتباها بين كل الاراضي ان الشهيد اول ما وقع وقع عليا وحتة ارض بتقولي مش عيب عليك كدة تخرج سليم ...انا متجننتش لأ..الارض بتفتكر زيي وزيك بالظبط
            المهم اني خرجت من محمد محمود وانا بفكر في حاجة واحدة اننا لو نسينا حق الشهدا والمصابين والاهداف الضحوا بأرواحهم ودمهم عشانها ...الارض هتفضل تلعن فينا كل ما نعدي وندوس عليها وتبقى عايزة تبلعنا لأن الارض ما بتنساش

بردانين

يوم جديد برد والشمس ضوئها إختفى

والدفا بس جوا قلوب الناس الطيبيين

احنا مين فينا طيبة ولا زاد فينا الجفا

هو لو فقلوبنا طيبة كنا ليه نكون بردانين

اه من الدنيا العجيبة دورت بينا السنين

جمدت فينا المشاعر زودت فينا الأنين

العمروا فى يوم ما شاعر ان ظلم الناس مهم

وفى عروقه تجري ميه اصل عندوا فقر دم

والجارح والقاسي والدوق ناس مئاسى

والذوق ف الظاهر بس للجوة ناسى

قولى يا نديمى الحقيقة بس متخبيش عليا

بفضل احسب فى حساباتى والنتيجة هيه هيه

جيبنا كل الدفايات جبنا من كل الحجات

فى العماير والشقق والشوارع والساحات

الهدوم تحت الهدوم والغطا مفروش عليا

ولسة برده بردانين قولى بقى  يبقى احنا مين؟؟

أول صف

اقتل اكتر يلا كمان يمكن تبقى في اول صف
 

قبل ما تيجي تنام باليل شوف الدم في قلب الكف
 

اوعى تبطل ظلم فيوم شعبنا هادي وراح فالنوم
 

بعد صلاة الجمعة كمان والقداس اقتل كام الف
 

يالا تعالى يا عم الشيخ واقعد هنا جنب القسيس
 

صلي وقبل ماتبتدي تعبد ضم في حضنك كل خسيس
 

بس امانة عليك مولانا وانت يا ابونا يا راعي الدين
 

وقت ما هنزل انضف بلدي واهتف ضد الكلب بدين
 

اوعى تقولي اروح بيتنا رايك عندي ده راي رخيص
 

اوعى تقولي رسولك قال تقرا ايات وتقول موال
 

طول ما الحال كدة نفس الحال انت الخادم للسلاطين
 

بعد ما شعبك نام واتغطى يلا بدم الشهدا اتوضا
 

واركع و اسجد ربنا عالم ان الحق في قلبك صدا
 

وانت يابونا في القداس  اوعظ يالا في قلب الناس
 

حببهم في كلاب السلطة زيك كدة زي الانجاس
 

وان جاز التعبير راح اقول و هكرر وانا المسئول
 

دينكم غير الدين النازل من  رب الغلبان والغول
 

بكرة هموت وهيجوا يعزوا  ويقدموا ملايين اعذار
 

بكرة تحرم اخد التار بعد ما دم الشهداء جف
 

بس امانا عليك مولانا وانت يا ابونا يا راعي الدين
 

قبل ما يوم تحضن وتبوس شوف الدم فقلب الكف
 

شوف الدم في قلب الكف..شوف الدم فقلب الكف